以前用 AI，我哋好多時會研究點樣寫好一個 Prompt：要畀咩角色、點交代背景、用咩格式。
但我自己嘅習慣已經慢慢變咗。我每日都會用 Typeless，亦經常用 ChatGPT 嘅 Voice Chat 同 AI 傾偈。好多事情，直接開口講就可以開始，唔使先坐低打好一段指令。
用得多之後，我發現最有用嘅地方，係講嘢更容易交代背景，亦更容易整理想法。
講出嚟，背景自然會多啲
打字嘅時候，我哋好容易將要求縮短。例如想寫文章，可能只會打：「幫我寫一篇關於 AI 語音工具嘅文章。」
但直接講，就可能變成：
我想寫吓而家用 AI 嘅習慣有咩唔同。我自己每日都有用 Typeless，覺得講嘢更容易交代背景。想由自己嘅經驗出發，唔好寫到似工具介紹。
短短幾句，已經交代咗出發點、個人經驗，同埋想要嘅方向。
呢啲資料，打字一樣講到。不過要逐隻字輸入，有時就會覺得「太長，算啦」。省略咗嘅背景，偏偏可能就係 AI 理解我哋需要嘅關鍵。
所以我每日用 Typeless，最有感覺嘅係可以先用自己平時講嘢嘅方式表達，再整理成文字，唔使一開始就諗好每句點寫。
截自 Typeless 官方示範：Mac 預設按 Fn 開始語音輸入，再按一次完成。此圖為官方示範，並非我嘅個人使用紀錄。
未諗清楚，都可以開始傾
用 Voice Chat 嘅時候，我更加感受到：唔一定要有一個完整問題，先可以同 AI 傾。
有時只係有個模糊想法，講咗出嚟，聽完佢嘅回應，先發現自己真正想講嘅係另一個角度。跟住就可以補一句：
呢個方向接近，但我想講嘅重點其實係……
又或者：
你啱啱提到嗰點幾有意思，可以再講深入少少。
呢個來回過程，本身就幫緊我整理思路。我一邊解釋畀 AI 聽，亦一邊釐清自己想要啲乜。
ChatGPT 網頁版實際截圖：輸入框最右邊嘅黑色聲波按鈕係「開始語音對話」。介面可能隨版本或帳戶而不同。Voice 官方說明
Typeless 幫我將說話變成文字；Voice Chat 就畀我透過對話，逐步諗清楚件事。兩種用法，都令我少咗「諗好晒先開始」嘅壓力。
Prompt 仍然有用，需要精確格式或者固定流程時，我一樣會寫清楚要求。但日常構思同寫作，我愈來愈習慣先講出嚟，再慢慢補充同修正。
對我而言，用好 AI 嘅重點，愈來愈係點樣講清楚自己嘅背景、想法同取捨。而呢件事，好多時由開口傾偈開始，反而更自然。